התדע על מפלשי עב מפלאות תמים דעים:

בשומי ענן לבשו וערפל חתלתו:

מי יספר שחקים בחכמה ונבלי שמים מי ישכיב:

ויהי בשבעית ויאמר הנה עב קטנה ככף איש עלה מים ויאמר עלה אמר אל אחאב אסר ורד ולא יעצרכה הגשם:

ויהי עד כה ועד כה והשמים התקדרו עבים ורוח ויהי גשם גדול וירכב אחאב וילך יזרעאלה:

המקרה במים עליותיו השם עבים רכובו המהלך על כנפי רוח:

שמעו שמוע ברגז קלו והגה מפיו יצא:

אחריו ישאג קול ירעם בקול גאונו ולא יעקבם כי ישמע קולו:

וירעם בשמים יהוה ועליון יתן קלו ברד וגחלי אש:

קול יהוה על המים אל הכבוד הרעים יהוה על מים רבים:

קול יהוה שבר ארזים וישבר יהוה את ארזי הלבנון:

קול יהוה חצב להבות אש:

קול יהוה יחולל אילות ויחשף יערות ובהיכלו כלו אמר כבוד:

ראוך מים אלהים ראוך מים יחילו אף ירגזו תהמות:

קול רעמך בגלגל האירו ברקים תבל רגזה ותרעש הארץ:

מן גערתך ינוסון מן קול רעמך יחפזון:

יהוה ארך אפים וגדול כח ונקה לא ינקה יהוה בסופה ובשערה דרכו וענן אבק רגליו:

ראוך יחילו הרים זרם מים עבר נתן תהום קולו רום ידיהו נשא: