12
ויהי יהושפט הלך וגדל עד למעלה ויבן ביהודה בירניות וערי מסכנות:
13
ומלאכה רבה היה לו בערי יהודה ואנשי מלחמה גבורי חיל בירושלם:
14
ואלה פקדתם לבית אבותיהם ליהודה שרי אלפים עדנה השר ועמו גבורי חיל שלש מאות אלף:
15
ועל ידו יהוחנן השר ועמו מאתים ושמונים אלף:
16
ועל ידו עמסיה בן זכרי המתנדב ליהוה ועמו מאתים אלף גבור חיל:
17
ומן בנימן גבור חיל אלידע ועמו נשקי קשת ומגן מאתים אלף:
18
ועל ידו יהוזבד ועמו מאה ושמונים אלף חלוצי צבא:
19
אלה המשרתים את המלך מלבד אשר נתן המלך בערי המבצר בכל יהודה:
