ולא יסף עוד מלאך יהוה להראה אל מנוח ואל אשתו אז ידע מנוח כי מלאך יהוה הוא:

ויאמר מנוח אל אשתו מות נמות כי אלהים ראינו:

ותאמר לו אשתו לו חפץ יהוה להמיתנו לא לקח מידנו עלה ומנחה ולא הראנו את כל אלה וכעת לא השמיענו כזאת:

ותקרא שם יהוה הדבר אליה אתה אל ראי כי אמרה הגם הלם ראיתי אחרי ראי:

ויקרא יעקב שם המקום פניאל כי ראיתי אלהים פנים אל פנים ותנצל נפשי:

ויאמר לא תוכל לראת את פני כי לא יראני האדם וחי:

אנכי עמד בין יהוה וביניכם בעת ההוא להגיד לכם את דבר יהוה כי יראתם מפני האש ולא עליתם בהר לאמר:

ותאמרו הן הראנו יהוה אלהינו את כבדו ואת גדלו ואת קלו שמענו מתוך האש היום הזה ראינו כי ידבר אלהים את האדם וחי:

כי מי כל בשר אשר שמע קול אלהים חיים מדבר מתוך האש כמנו ויחי:

ואמר אוי לי כי נדמיתי כי איש טמא שפתים אנכי ובתוך עם טמא שפתים אנכי יושב כי את המלך יהוה צבאות ראו עיני:

ויגע על פי ויאמר הנה נגע זה על שפתיך וסר עונך וחטאתך תכפר:

את האלהים לא ראה איש מעולם הבן היחיד אשר בחיק האב הוא הודיע:

כזאת דבר ישעיהו בראותו את תפארתו וינבא עליו: