וכאור בקר יזרח שמש בקר לא עבות מנגה ממטר דשא מארץ:

אחרי דברי לא ישנו ועלימו תטף מלתי:

ויחלו כמטר לי ופיהם פערו למלקוש:

ירד כמטר על גז כרביבים זרזיף ארץ:

כי כאשר ירד הגשם והשלג מן השמים ושמה לא ישוב כי אם הרוה את הארץ והולידה והצמיחה ונתן זרע לזרע ולחם לאכל:

כן יהיה דברי אשר יצא מפי לא ישוב אלי ריקם כי אם עשה את אשר חפצתי והצליח אשר שלחתיו:

מה אעשה לך אפרים מה אעשה לך יהודה וחסדכם כענן בקר וכטל משכים הלך:

אהיה כטל לישראל יפרח כשושנה ויך שרשיו כלבנון:

אני נטעתי ואפולוס השקה אבל האלהים הוא הצמיח:

והנטע והמשקה כאחד המה ואיש איש יקבל את שכרו כפי עמלו:

כי האדמה השותה את הגשם הירד עליה למכביר ומוציאה עשב טוב לעבדיה תשא ברכה מאת האלהים:

והיה שארית יעקב בקרב עמים רבים כטל מאת יהוה כרביבים עלי עשב אשר לא יקוה לאיש ולא ייחל לבני אדם:

שאלו מיהוה מטר בעת מלקוש יהוה עשה חזיזים ומטר גשם יתן להם לאיש עשב בשדה: