ויען ויאמר אנשים אחים ואבות שמעו אלהי הכבוד נראה אל אברהם אבינו בהיותו בארם נהרים לפני שבתו בחרן:

ויצא מארץ כשדים וישב בחרן ואחרי מות אביו העביר אתו משם אל הארץ הזאת אשר אתם ישבים בה עתה:

ויאמר לו אלהים כי גר יהיה זרעו בארץ לא להם ועבדום וענו אתם ארבע מאות שנה:

ויתן לו את ברית המילה ובכן הוליד את יצחק וימל אתו ביום השמיני ויצחק הוליד את יעקב ויעקב הוליד את שנים עשר האבות:

ויצילהו מכל צרותיו ויתן לו חן וחכמה לפני פרעה מלך מצרים וישימהו שליט על מצרים ועל כל ביתו:

וישמע יעקב כי יש שבר במצרים וישלח שמה את אבותינו בפעם הראשונה:

וישלח יוסף ויקרא ליעקב אביו ולכל משפחתו בשבעים וחמש נפש:

ויובאו שכמה ויושמו בקבר אשר קנה אברהם בכספו מיד בני חמור אבי שכם:

עד כי קם מלך אחר אשר לא ידע את יוסף:

בעת ההיא נולד משה ויהי טוב לאלהים ויהי אמון בבית אביו שלשה ירחים:

וילמד משה בכל חכמת מצרים ויהי גבור בדברים ובמעשים:

וירא איש אחד מעשק חנם ויושע לו ויקם נקמת המכה בהכותו את המצרי:

ויהי ביום השני ויבא בתוכם והם נצים ויבקש לעשות שלום ביניהם לאמר אנשים אחים אתם ולמה תעשקו איש את אחיו:

הלהרגני אתה אמר כאשר הרגת אתמל את המצרי:

ובמלאת ארבעים שנה נראה אליו מלאך יהוה במדבר הר סיני בלבת אש מתוך הסנה:

אנכי אלהי אבותיך אלהי אברהם אלהי יצחק ואלהי יעקב ויחרד משה ויירא מהביט:

ראה ראיתי את עני עמי אשר במצרים ואת נאקתם שמעתי וארד להצילם ועתה לכה ואשלחך מצרימה:

והוא הוציאם ויעש אתות ומפתים בארץ מצרים ובים סוף ובמדבר ארבעים שנה:

הוא אשר היה בקהל במדבר עם המלאך הדבר אליו בהר סיני ועם אבותינו ואשר קבל דברים חיים לתת לנו:

ויאמרו אל אהרן עשה לנו אלהים אשר ילכו לפנינו כי זה משה אשר העלנו מארץ מצרים לא ידענו מה היה לו:

ויפן מהם האלהים ויתנם לעבד את צבא השמים כאשר כתוב בספר הנביאים הזבחים ומנחה הגשתם לי במדבר ארבעים שנה בית ישראל:

משכן העדות היה לאבותינו במדבר כאשר צוה המדבר אל משה לעשות אתו כתבנית אשר ראה:

והוא מצא חן בעיני אלהים וישאל למצא משכנות לאלהי יעקב:

אבל העליון לא ישכן בהיכלות מעשי ידים כאשר אמר הנביא:

הלא את כל אלה ידי עשתה:

מי מהנביאים אשר לא רדפוהו אבותיכם אף המיתו את המבשרים מקדם ביאת הצדיק אשר עתה הייתם אתם מוסריו ומרצחיו:

ויאמר יהוה אל אברם לך לך מארצך וממולדתך ומבית אביך אל הארץ אשר אראך:

ואברכה מברכיך ומקללך אאר ונברכו בך כל משפחת האדמה:

והקמתי את בריתי ביני ובינך ובין זרעך אחריך לדרתם לברית עולם להיות לך לאלהים ולזרעך אחריך:

ונתתי לך ולזרעך אחריך את ארץ מגריך את כל ארץ כנען לאחזת עולם והייתי להם לאלהים:

ותחת כי אהב את אבתיך ויבחר בזרעו אחריו ויוצאך בפניו בכחו הגדל ממצרים:

כי עם קדוש אתה ליהוה אלהיך בך בחר יהוה אלהיך להיות לו לעם סגלה מכל העמים אשר על פני האדמה:

כי מאהבת יהוה אתכם ומשמרו את השבעה אשר נשבע לאבתיכם הוציא יהוה אתכם ביד חזקה ויפדך מבית עבדים מיד פרעה מלך מצרים:

לא בצדקתך ובישר לבבך אתה בא לרשת את ארצם כי ברשעת הגוים האלה יהוה אלהיך מורישם מפניך ולמען הקים את הדבר אשר נשבע יהוה לאבתיך לאברהם ליצחק וליעקב:

כי עם קדוש אתה ליהוה אלהיך ובך בחר יהוה להיות לו לעם סגלה מכל העמים אשר על פני האדמה:

אתה הוא יהוה האלהים אשר בחרת באברם והוצאתו מאור כשדים ושמת שמו אברהם:

ומצאת את לבבו נאמן לפניך וכרות עמו הברית לתת את ארץ הכנעני החתי האמרי והפרזי והיבוסי והגרגשי לתת לזרעו ותקם את דבריך כי צדיק אתה:

זרע אברהם עבדו בני יעקב בחיריו:

זכר לעולם בריתו דבר צוה לאלף דור:

ויעמידה ליעקב לחק לישראל ברית עולם:

בהיותם מתי מספר כמעט וגרים בה:

כי יעקב בחר לו יה ישראל לסגלתו:

ואתה ישראל עבדי יעקב אשר בחרתיך זרע אברהם אהבי:

אשר החזקתיך מקצות הארץ ומאציליה קראתיך ואמר לך עבדי אתה בחרתיך ולא מאסתיך:

ועתה שמע יעקב עבדי וישראל בחרתי בו:

הלוא ראית מה העם הזה דברו לאמר שתי המשפחות אשר בחר יהוה בהם וימאסם ואת עמי ינאצון מהיות עוד גוי לפניהם:

גם זרע יעקוב ודוד עבדי אמאס מקחת מזרעו משלים אל זרע אברהם ישחק ויעקב כי אשוב את שבותם ורחמתים:

ואתם הנכם זרע נבחר ממלכת כהנים וגוי קדוש ועם סגלה למען תספרו תהלות הקורא אתכם מחשך אל אורו הנפלא:

ויהי כאשר קרבה עת ההבטחה אשר נשבע אלהים לאברהם ויגדל העם וירב במצרים:

ובני ישראל פרו וישרצו וירבו ויעצמו במאד מאד ותמלא הארץ אתם:

ויאמר אל עמו הנה עם בני ישראל רב ועצום ממנו:

בשבעים נפש ירדו אבתיך מצרימה ועתה שמך יהוה אלהיך ככוכבי השמים לרב:

ויבא ישראל מצרים ויעקב גר בארץ חם:

ויפר את עמו מאד ויעצמהו מצריו:

והוא הוציאם ויעש אתות ומפתים בארץ מצרים ובים סוף ובמדבר ארבעים שנה:

ויאמר יהוה אל משה עתה תראה אשר אעשה לפרעה כי ביד חזקה ישלחם וביד חזקה יגרשם מארצו:

וארא אל אברהם אל יצחק ואל יעקב באל שדי ושמי יהוה לא נודעתי להם:

וגם אני שמעתי את נאקת בני ישראל אשר מצרים מעבדים אתם ואזכר את בריתי:

ולקחתי אתכם לי לעם והייתי לכם לאלהים וידעתם כי אני יהוה אלהיכם המוציא אתכם מתחת סבלות מצרים:

וידבר משה כן אל בני ישראל ולא שמעו אל משה מקצר רוח ומעבדה קשה:

בא דבר אל פרעה מלך מצרים וישלח את בני ישראל מארצו:

וידבר יהוה אל משה ואל אהרן ויצום אל בני ישראל ואל פרעה מלך מצרים להוציא את בני ישראל מארץ מצרים:

אז ישיר משה ובני ישראל את השירה הזאת ליהוה ויאמרו לאמר אשירה ליהוה כי גאה גאה סוס ורכבו רמה בים:

יהוה איש מלחמה יהוה שמו:

תהמת יכסימו ירדו במצולת כמו אבן:

וברב גאונך תהרס קמיך תשלח חרנך יאכלמו כקש:

אמר אויב ארדף אשיג אחלק שלל תמלאמו נפשי אריק חרבי תורישמו ידי:

מי כמכה באלם יהוה מי כמכה נאדר בקדש נורא תהלת עשה פלא:

נחית בחסדך עם זו גאלת נהלת בעזך אל נוה קדשך:

אז נבהלו אלופי אדום אילי מואב יאחזמו רעד נמגו כל ישבי כנען:

תבאמו ותטעמו בהר נחלתך מכון לשבתך פעלת יהוה מקדש אדני כוננו ידיך:

כי בא סוס פרעה ברכבו ובפרשיו בים וישב יהוה עלהם את מי הים ובני ישראל הלכו ביבשה בתוך הים:

ותען להם מרים שירו ליהוה כי גאה גאה סוס ורכבו רמה בים:

עתה ידעתי כי גדול יהוה מכל האלהים כי בדבר אשר זדו עליהם:

ואתכם לקח יהוה ויוצא אתכם מכור הברזל ממצרים להיות לו לעם נחלה כיום הזה:

או הנסה אלהים לבוא לקחת לו גוי מקרב גוי במסת באתת ובמופתים ובמלחמה וביד חזקה ובזרוע נטויה ובמוראים גדלים ככל אשר עשה לכם יהוה אלהיכם במצרים לעיניך:

המסת הגדלת אשר ראו עיניך והאתת והמפתים והיד החזקה והזרע הנטויה אשר הוצאך יהוה אלהיך כן יעשה יהוה אלהיך לכל העמים אשר אתה ירא מפניהם:

אוי לנו מי יצילנו מיד האלהים האדירים האלה אלה הם האלהים המכים את מצרים בכל מכה במדבר:

ותרא את עני אבתינו במצרים ואת זעקתם שמעת על ים סוף:

והים בקעת לפניהם ויעברו בתוך הים ביבשה ואת רדפיהם השלכת במצולת כמו אבן במים עזים:

אלהים בקדש דרכך מי אל גדול כאלהים:

גאלת בזרוע עמך בני יעקב ויוסף סלה:

זרמו מים עבות קול נתנו שחקים אף חצציך יתהלכו:

בים דרכך ושביליך במים רבים ועקבותיך לא נדעו:

נגד אבותם עשה פלא בארץ מצרים שדה צען:

בקע ים ויעבירם ויצב מים כמו נד:

לא זכרו את ידו יום אשר פדם מני צר:

ויהפך לדם יאריהם ונזליהם בל ישתיון:

ויתן לחסיל יבולם ויגיעם לארבה:

ויסגר לברד בעירם ומקניהם לרשפים:

יפלס נתיב לאפו לא חשך ממות נפשם וחיתם לדבר הסגיר:

ויסע כצאן עמו וינהגם כעדר במדבר:

שלח משה עבדו אהרן אשר בחר בו:

שלח חשך ויחשך ולא מרו את דבריו:

שרץ ארצם צפרדעים בחדרי מלכיהם:

נתן גשמיהם ברד אש להבות בארצם:

אמר ויבא ארבה וילק ואין מספר:

ויך כל בכור בארצם ראשית לכל אונם:

שמח מצרים בצאתם כי נפל פחדם עליהם:

אבותינו במצרים לא השכילו נפלאותיך לא זכרו את רב חסדיך וימרו על ים בים סוף:

ויגער בים סוף ויחרב ויוליכם בתהמות כמדבר:

ויכסו מים צריהם אחד מהם לא נותר:

בצאת ישראל ממצרים בית יעקב מעם לעז:

הים ראה וינס הירדן יסב לאחור:

מה לך הים כי תנוס הירדן תסב לאחור:

מלפני אדון חולי ארץ מלפני אלוה יעקב:

שהכה בכורי מצרים מאדם עד בהמה:

שהכה גוים רבים והרג מלכים עצומים:

למכה מצרים בבכוריהם כי לעולם חסדו:

ביד חזקה ובזרוע נטויה כי לעולם חסדו:

והעביר ישראל בתוכו כי לעולם חסדו:

בכל צרתם לא צר ומלאך פניו הושיעם באהבתו ובחמלתו הוא גאלם וינטלם וינשאם כל ימי עולם:

ויזכר ימי עולם משה עמו איה המעלם מים את רעי צאנו איה השם בקרבו את רוח קדשו:

מוליכם בתהמות כסוס במדבר לא יכשלו:

אשר שמת אתות ומפתים בארץ מצרים עד היום הזה ובישראל ובאדם ותעשה לך שם כיום הזה:

ותצא את עמך את ישראל מארץ מצרים באתות ובמופתים וביד חזקה ובאזרוע נטויה ובמורא גדול:

ואנכי העליתי אתכם מארץ מצרים ואולך אתכם במדבר ארבעים שנה לרשת את ארץ האמרי:

כי העלתיך מארץ מצרים ומבית עבדים פדיתיך ואשלח לפניך את משה אהרן ומרים:

כימי צאתך מארץ מצרים אראנו נפלאות:

יראו גוים ויבשו מכל גבורתם ישימו יד על פה אזניהם תחרשנה: