1
ויהי בעת ההוא וירד יהודה מאת אחיו ויט עד איש עדלמי ושמו חירה:
2
וירא שם יהודה בת איש כנעני ושמו שוע ויקחה ויבא אליה:
3
ותהר ותלד בן ויקרא את שמו ער:
4
ותהר עוד ותלד בן ותקרא את שמו אונן:
5
ותסף עוד ותלד בן ותקרא את שמו שלה והיה בכזיב בלדתה אתו:
6
ויקח יהודה אשה לער בכורו ושמה תמר:
7
ויהי ער בכור יהודה רע בעיני יהוה וימתהו יהוה:
8
ויאמר יהודה לאונן בא אל אשת אחיך ויבם אתה והקם זרע לאחיך:
9
וידע אונן כי לא לו יהיה הזרע והיה אם בא אל אשת אחיו ושחת ארצה לבלתי נתן זרע לאחיו:
10
וירע בעיני יהוה אשר עשה וימת גם אתו:
