שובה ישראל עד יהוה אלהיך כי כשלת בעונך:

ויהי כי חטאו בני ישראל ליהוה אלהיהם המעלה אתם מארץ מצרים מתחת יד פרעה מלך מצרים וייראו אלהים אחרים:

ויחפאו בני ישראל דברים אשר לא כן על יהוה אלהיהם ויבנו להם במות בכל עריהם ממגדל נוצרים עד עיר מבצר:

ויקטרו שם בכל במות כגוים אשר הגלה יהוה מפניהם ויעשו דברים רעים להכעיס את יהוה:

ויעד יהוה בישראל וביהודה ביד כל נביאו כל חזה לאמר שבו מדרכיכם הרעים ושמרו מצותי חקותי ככל התורה אשר צויתי את אבתיכם ואשר שלחתי אליכם ביד עבדי הנביאים:

וימאסו את חקיו ואת בריתו אשר כרת את אבותם ואת עדותיו אשר העיד בם וילכו אחרי ההבל ויהבלו ואחרי הגוים אשר סביבתם אשר צוה יהוה אתם לבלתי עשות כהם:

ויעבירו את בניהם ואת בנותיהם באש ויקסמו קסמים וינחשו ויתמכרו לעשות הרע בעיני יהוה להכעיסו:

נאף אשה חסר לב משחית נפשו הוא יעשנה:

וחטאי חמס נפשו כל משנאי אהבו מות:

הכרת פניהם ענתה בם וחטאתם כסדם הגידו לא כחדו אוי לנפשם כי גמלו להם רעה:

אוי לרשע רע כי גמול ידיו יעשה לו:

הלוא זאת תעשה לך עזבך את יהוה אלהיך בעת מוליכך בדרך:

תיסרך רעתך ומשבותיך תוכחך ודעי וראי כי רע ומר עזבך את יהוה אלהיך ולא פחדתי אליך נאם אדני יהוה צבאות:

דרכך ומעלליך עשו אלה לך זאת רעתך כי מר כי נגע עד לבך:

עונותיכם הטו אלה וחטאותיכם מנעו הטוב מכם:

ועתה חלו נא פני אל ויחננו מידכם היתה זאת הישא מכם פנים אמר יהוה צבאות:

ואנכי יהוה אלהיך מארץ מצרים ואלהים זולתי לא תדע ומושיע אין בלתי:

אין כאל ישרון רכב שמים בעזרך ובגאותו שחקים:

נפשנו חכתה ליהוה עזרנו ומגננו הוא:

למנצח לבני קרח על עלמות שיר אלהים לנו מחסה ועז עזרה בצרות נמצא מאד:

שיר למעלות אשא עיני אל ההרים מאין יבא עזרי:

עזרי מעם יהוה עשה שמים וארץ:

אשרי שאל יעקב בעזרו שברו על יהוה אלהיו:

ברוך הוא האלהים ואבי אדנינו ישוע המשיח אשר ברכנו בכל ברכת רוח במרומים במשיח:

יעדנו לו לבנים על ידי ישוע המשיח כחפץ רצונו:

כי גם אנחנו היינו מלפנים חסרי דעת וסוררים ותועים ועבדים לתאות ולתשוקות שנות ומתהלכים ברשעה וקנאה ושנואים ושנאים איש את אחיו:

אז לא בגלל מעשי הצדקה אשר עשינו הושיע אתנו כי אם מתוך חסדו על ידי טבילת התולדה השניה וחדוש רוח הקדש:

למען נצדק בחסדו ונירש לפי התקוה את חיי העולמים: