ארפא משובתם אהבם נדבה כי שב אפי ממנו:

ועתה הניחה לי ויחר אפי בהם ואכלם ואעשה אותך לגוי גדול:

למה יאמרו מצרים לאמר ברעה הוציאם להרג אתם בהרים ולכלתם מעל פני האדמה שוב מחרון אפך והנחם על הרעה לעמך:

וינחם יהוה על הרעה אשר דבר לעשות לעמו:

אמרתי אפאיהם אשביתה מאנוש זכרם:

לולי כעס אויב אגור פן ינכרו צרימו פן יאמרו ידינו רמה ולא יהוה פעל כל זאת:

והוא רחום יכפר עון ולא ישחית והרבה להשיב אפו ולא יעיר כל חמתו:

חמה אין לי מי יתנני שמיר שית במלחמה אפשעה בה אציתנה יחד:

הבאים ישרש יעקב יציץ ופרח ישראל ומלאו פני תבל תנובה:

בסאסאה בשלחה תריבנה הגה ברוחו הקשה ביום קדים:

למען שמי אאריך אפי ותהלתי אחטם לך לבלתי הכריתך:

כי אתך אני נאם יהוה להושיעך כי אעשה כלה בכל הגוים אשר הפצותיך שם אך אתך לא אעשה כלה ויסרתיך למשפט ונקה לא אנקך:

בעת ההיא נאם יהוה אהיה לאלהים לכל משפחות ישראל והמה יהיו לי לעם:

מרחוק יהוה נראה לי ואהבת עולם אהבתיך על כן משכתיך חסד:

וימרו בי ולא אבו לשמע אלי איש את שקוצי עיניהם לא השליכו ואת גלולי מצרים לא עזבו ואמר לשפך חמתי עליהם לכלות אפי בהם בתוך ארץ מצרים:

ואעש למען שמי לבלתי החל לעיני הגוים אשר המה בתוכם אשר נודעתי אליהם לעיניהם להוציאם מארץ מצרים:

וימרו בי בית ישראל במדבר בחקותי לא הלכו ואת משפטי מאסו אשר יעשה אתם האדם וחי בהם ואת שבתתי חללו מאד ואמר לשפך חמתי עליהם במדבר לכלותם:

ואעשה למען שמי לבלתי החל לעיני הגוים אשר הוצאתים לעיניהם:

וימרו בי הבנים בחקותי לא הלכו ואת משפטי לא שמרו לעשות אותם אשר יעשה אותם האדם וחי בהם את שבתותי חללו ואמר לשפך חמתי עליהם לכלות אפי בם במדבר:

גם אני נשאתי את ידי להם במדבר להפיץ אתם בגוים ולזרות אותם בארצות:

ויאמר אבישי אל דוד סגר אלהים היום את אויבך בידך ועתה אכנו נא בחנית ובארץ פעם אחת ולא אשנה לו:

ועמשא לא נשמר בחרב אשר ביד יואב ויכהו בה אל החמש וישפך מעיו ארצה ולא שנה לו וימת ויואב ואבישי אחיו רדף אחרי שבע בן בכרי:

לא איש אל ויכזב ובן אדם ויתנחם ההוא אמר ולא יעשה ודבר ולא יקימנה:

כי לא מחשבותי מחשבותיכם ולא דרכיכם דרכי נאם יהוה:

כי גבהו שמים מארץ כן גבהו דרכי מדרכיכם ומחשבתי ממחשבתיכם:

מי אל כמוך נשא עון ועבר על פשע לשארית נחלתו לא החזיק לעד אפו כי חפץ חסד הוא:

תתן אמת ליעקב חסד לאברהם אשר נשבעת לאבתינו מימי קדם:

כי אני יהוה לא שניתי ואתם בני יעקב לא כליתם:

הן לפי הבשורה שנואים הם למענכם אך לפי הבחירה חביבים הם למען האבות:

כי לא ינחם האלהים על מתנותיו ועל קריאתו:

צהלי ורני יושבת ציון כי גדול בקרבך קדוש ישראל:

והיה משכני עליהם והייתי להם לאלהים והמה יהיו לי לעם:

וידעו הגוים כי אני יהוה מקדש את ישראל בהיות מקדשי בתוכם לעולם:

הסיר יהוה משפטיך פנה איבך מלך ישראל יהוה בקרבך לא תיראי רע עוד:

יהוה אלהיך בקרבך גבור יושיע ישיש עליך בשמחה יחריש באהבתו יגיל עליך ברנה: