בנשך נתן ותרבית לקח וחי לא יחיה את כל התועבות האלה עשה מות יומת דמיו בו יהיה:

מעני השיב ידו נשך ותרבית לא לקח משפטי עשה בחקותי הלך הוא לא ימות בעון אביו חיה יחיה:

שחד לקחו בך למען שפך דם נשך ותרבית לקחת ותבצעי רעיך בעשק ואתי שכחת נאם אדני יהוה:

אם כסף תלוה את עמי את העני עמך לא תהיה לו כנשה לא תשימון עליו נשך:

וכי ימוך אחיך ומטה ידו עמך והחזקת בו גר ותושב וחי עמך:

את כספך לא תתן לו בנשך ובמרבית לא תתן אכלך:

לא תשיך לאחיך נשך כסף נשך אכל נשך כל דבר אשר ישך:

לנכרי תשיך ולאחיך לא תשיך למען יברכך יהוה אלהיך בכל משלח ידך על הארץ אשר אתה בא שמה לרשתה:

ותהי צעקת העם ונשיהם גדולה אל אחיהם היהודים:

ויש אשר אמרים שדתינו וכרמינו ובתינו אנחנו ערבים ונקחה דגן ברעב:

ועתה כבשר אחינו בשרנו כבניהם בנינו והנה אנחנו כבשים את בנינו ואת בנתינו לעבדים ויש מבנתינו נכבשות ואין לאל ידנו ושדתינו וכרמינו לאחרים:

וימלך לבי עלי ואריבה את החרים ואת הסגנים ואמרה להם משא איש באחיו אתם נשאים ואתן עליהם קהלה גדולה:

ויאמר לא טוב הדבר אשר אתם עשים הלוא ביראת אלהינו תלכו מחרפת הגוים אויבינו:

השיבו נא להם כהיום שדתיהם כרמיהם זיתיהם ובתיהם ומאת הכסף והדגן התירוש והיצהר אשר אתם נשים בהם:

כספו לא נתן בנשך ושחד על נקי לא לקח עשה אלה לא ימוט לעולם:

מרבה הונו בנשך ובתרבית לחונן דלים יקבצנו:

אוי לי אמי כי ילדתני איש ריב ואיש מדון לכל הארץ לא נשיתי ולא נשו בי כלה מקללוני:

ואהיה תמים לו ואשתמרה מעוני:

והפחות הראשנים אשר לפני הכבידו על העם ויקחו מהם בלחם ויין אחר כסף שקלים ארבעים גם נעריהם שלטו על העם ואני לא עשיתי כן מפני יראת אלהים:

הלך צדקות ודבר מישרים מאס בבצע מעשקות נער כפיו מתמך בשחד אטם אזנו משמע דמים ועצם עיניו מראות ברע:

לא תעשו עול במשפט לא תשא פני דל ולא תהדר פני גדול בצדק תשפט עמיתך:

לא תעשו עול במשפט במדה במשקל ובמשורה:

ואצוה את שפטיכם בעת ההוא לאמר שמע בין אחיכם ושפטתם צדק בין איש ובין אחיו ובין גרו:

לא תכירו פנים במשפט כקטן כגדל תשמעון לא תגורו מפני איש כי המשפט לאלהים הוא והדבר אשר יקשה מכם תקרבון אלי ושמעתיו:

שפטים ושטרים תתן לך בכל שעריך אשר יהוה אלהיך נתן לך לשבטיך ושפטו את העם משפט צדק:

צדק צדק תרדף למען תחיה וירשת את הארץ אשר יהוה אלהיך נתן לך:

בצאתי שער עלי קרת ברחוב אכין מושבי:

שרים עצרו במלים וכף ישימו לפיהם:

כי אזן שמעה ותאשרני ועין ראתה ותעידני:

ברכת אבד עלי תבא ולב אלמנה ארנן:

עינים הייתי לעור ורגלים לפסח אני:

ואשברה מתלעות עול ומשניו אשליך טרף:

פתח פיך לאלם אל דין כל בני חלוף:

פתח פיך שפט צדק ודין עני ואביון:

למדו היטב דרשו משפט אשרו חמוץ שפטו יתום ריבו אלמנה:

התמלך כי אתה מתחרה בארז אביך הלוא אכל ושתה ועשה משפט וצדקה אז טוב לו:

דן דין עני ואביון אז טוב הלוא היא הדעת אתי נאם יהוה:

כה אמר יהוה צבאות לאמר משפט אמת שפטו וחסד ורחמים עשו איש את אחיו:

ואלמנה ויתום גר ועני אל תעשקו ורעת איש אחיו אל תחשבו בלבבכם:

אלה הדברים אשר תעשו דברו אמת איש את רעהו אמת ומשפט שלום שפטו בשעריכם: