יהוה עיניך הלוא לאמונה הכיתה אתם ולא חלו כליתם מאנו קחת מוסר חזקו פניהם מסלע מאנו לשוב:

הוסרי ירושלם פן תקע נפשי ממך פן אשימך שממה ארץ לוא נושבה:

על מי אדברה ואעידה וישמעו הנה ערלה אזנם ולא יוכלו להקשיב הנה דבר יהוה היה להם לחרפה לא יחפצו בו:

מי האיש החכם ויבן את זאת ואשר דבר פי יהוה אליו ויגדה על מה אבדה הארץ נצתה כמדבר מבלי עבר:

ויפנו אלי ערף ולא פנים ולמד אתם השכם ולמד ואינם שמעים לקחת מוסר:

אשכילך ואורך בדרך זו תלך איעצה עליך עיני:

אל תהיו כסוס כפרד אין הבין במתג ורסן עדיו לבלום בל קרב אליך:

קחו מוסרי ואל כסף ודעת מחרוץ נבחר:

שמע עצה וקבל מוסר למען תחכם באחריתך:

את מי יורה דעה ואת מי יבין שמועה גמולי מחלב עתיקי משדים:

כי בלעגי שפה ובלשון אחרת ידבר אל העם הזה:

מי בכם יאזין זאת יקשב וישמע לאחור:

לכן ראו פן תמאנו לשמע אל המדבר כי הן לא נמלטו המאנים לשמע אל המדבר עמהם בארץ אף אנחנו אם נמאן לשמע בקול המדבר מן השמים: