שמנו עשתו גם עברו דברי רע דין לא דנו דין יתום ויצליחו ומשפט אביונים לא שפטו:

כי אם בזאת יתהלל המתהלל השכל וידע אותי כי אני יהוה עשה חסד משפט וצדקה בארץ כי באלה חפצתי נאם יהוה:

בית דוד כה אמר יהוה דינו לבקר משפט והצילו גזול מיד עושק פן תצא כאש חמתי ובערה ואין מכבה מפני רע מעלליהם:

לא תטה משפט אבינך בריבו:

ושחד לא תקח כי השחד יעור פקחים ויסלף דברי צדיקים:

לא תעשו עול במשפט לא תשא פני דל ולא תהדר פני גדול בצדק תשפט עמיתך:

שפטים ושטרים תתן לך בכל שעריך אשר יהוה אלהיך נתן לך לשבטיך ושפטו את העם משפט צדק:

צדק צדק תרדף למען תחיה וירשת את הארץ אשר יהוה אלהיך נתן לך:

כי יהיה ריב בין אנשים ונגשו אל המשפט ושפטום והצדיקו את הצדיק והרשיעו את הרשע:

אמר אלהי ישראל לי דבר צור ישראל מושל באדם צדיק מושל יראת אלהים:

בצאתי שער עלי קרת ברחוב אכין מושבי:

שרים עצרו במלים וכף ישימו לפיהם:

כי אזן שמעה ותאשרני ועין ראתה ותעידני:

ברכת אבד עלי תבא ולב אלמנה ארנן:

עינים הייתי לעור ורגלים לפסח אני:

ואשברה מתלעות עול ומשניו אשליך טרף:

ידין עמך בצדק וענייך במשפט:

ישפט עניי עם יושיע לבני אביון וידכא עושק:

ראשיה בשחד ישפטו וכהניה במחיר יורו ונביאיה בכסף יקסמו ועל יהוה ישענו לאמר הלוא יהוה בקרבנו לא תבוא עלינו רעה:

כה אמר יהוה צבאות לאמר משפט אמת שפטו וחסד ורחמים עשו איש את אחיו:

וימאנו להקשיב ויתנו כתף סררת ואזניהם הכבידו משמוע:

עשה משפט יתום ואלמנה ואהב גר לתת לו לחם ושמלה:

כי ימצא איש גנב נפש מאחיו מבני ישראל והתעמר בו ומכרו ומת הגנב ההוא ובערת הרע מקרבך:

ארור מטה משפט גר יתום ואלמנה ואמר כל העם אמן:

אלמנות שלחת ריקם וזרעות יתמים ידכא:

יגזלו משד יתום ועל עני יחבלו:

כי אמלט עני משוע ויתום ולא עזר לו:

אבי יתומים ודין אלמנות אלהים במעון קדשו:

אלמנה וגר יהרגו ויתומים ירצחו:

אל תסג גבול עולם ובשדי יתומים אל תבא:

שריך סוררים וחברי גנבים כלו אהב שחד ורדף שלמנים יתום לא ישפטו וריב אלמנה לא יבוא אליהם:

אב ואם הקלו בך לגר עשו בעשק בתוכך יתום ואלמנה הונו בך:

וקרבתי אליכם למשפט והייתי עד ממהר במכשפים ובמנאפים ובנשבעים לשקר ובעשקי שכר שכיר אלמנה ויתום ומטי גר ולא יראוני אמר יהוה צבאות:

זאת העבודה הטהורה והברה לפני האלהים אבינו לבקר את היתומים והאלמנות בלחצם ולשמר את עצמו נקי מחלאת העולם:

כי אין עיניך ולבך כי אם על בצעך ועל דם הנקי לשפוך ועל העשק ועל המרוצה לעשות:

גר יתום ואלמנה לא תעשקו ודם נקי אל תשפכו במקום הזה ואחרי אלהים אחרים לא תלכו לרע לכם:

ויאמרו השרים וכל העם אל הכהנים ואל הנביאים אין לאיש הזה משפט מות כי בשם יהוה אלהינו דבר אלינו:

ולא ישפך דם נקי בקרב ארצך אשר יהוה אלהיך נתן לך נחלה והיה עליך דמים:

ושלחו זקני עירו ולקחו אתו משם ונתנו אתו ביד גאל הדם ומת:

וגם דם הנקי אשר שפך וימלא את ירושלם דם נקי ולא אבה יהוה לסלח:

יגודו על נפש צדיק ודם נקי ירשיעו:

עינים רמות לשון שקר וידים שפכות דם נקי:

ובפרשכם כפיכם אעלים עיני מכם גם כי תרבו תפלה אינני שמע ידיכם דמים מלאו:

למדו היטב דרשו משפט אשרו חמוץ שפטו יתום ריבו אלמנה:

אם תאבו ושמעתם טוב הארץ תאכלו:

מצרים לשממה תהיה ואדום למדבר שממה תהיה מחמס בני יהודה אשר שפכו דם נקיא בארצם: