ואמרת ביום ההוא אודך יהוה כי אנפת בי ישב אפך ותנחמני:

ושאבתם מים בששון ממעיני הישועה:

זמרו יהוה כי גאות עשה מידעת זאת בכל הארץ:

אז ישיר משה ובני ישראל את השירה הזאת ליהוה ויאמרו לאמר אשירה ליהוה כי גאה גאה סוס ורכבו רמה בים:

יהוה איש מלחמה יהוה שמו:

תהמת יכסימו ירדו במצולת כמו אבן:

וברב גאונך תהרס קמיך תשלח חרנך יאכלמו כקש:

אמר אויב ארדף אשיג אחלק שלל תמלאמו נפשי אריק חרבי תורישמו ידי:

מי כמכה באלם יהוה מי כמכה נאדר בקדש נורא תהלת עשה פלא:

נחית בחסדך עם זו גאלת נהלת בעזך אל נוה קדשך:

אז נבהלו אלופי אדום אילי מואב יאחזמו רעד נמגו כל ישבי כנען:

תבאמו ותטעמו בהר נחלתך מכון לשבתך פעלת יהוה מקדש אדני כוננו ידיך:

כי בא סוס פרעה ברכבו ובפרשיו בים וישב יהוה עלהם את מי הים ובני ישראל הלכו ביבשה בתוך הים:

ותען להם מרים שירו ליהוה כי גאה גאה סוס ורכבו רמה בים:

ותשר דבורה וברק בן אבינעם ביום ההוא לאמר:

שמעו מלכים האזינו רזנים אנכי ליהוה אנכי אשירה אזמר ליהוה אלהי ישראל:

הרים נזלו מפני יהוה זה סיני מפני יהוה אלהי ישראל:

חדלו פרזון בישראל חדלו עד שקמתי דבורה שקמתי אם בישראל:

לבי לחוקקי ישראל המתנדבים בעם ברכו יהוה:

מקול מחצצים בין משאבים שם יתנו צדקות יהוה צדקת פרזנו בישראל אז ירדו לשערים עם יהוה:

אז ירד שריד לאדירים עם יהוה ירד לי בגבורים:

ושרי ביששכר עם דברה ויששכר כן ברק בעמק שלח ברגליו בפלגות ראובן גדלים חקקי לב:

גלעד בעבר הירדן שכן ודן למה יגור אניות אשר ישב לחוף ימים ועל מפרציו ישכון:

באו מלכים נלחמו אז נלחמו מלכי כנען בתענך על מי מגדו בצע כסף לא לקחו:

נחל קישון גרפם נחל קדומים נחל קישון תדרכי נפשי עז:

אורו מרוז אמר מלאך יהוה ארו ארור ישביה כי לא באו לעזרת יהוה לעזרת יהוה בגבורים:

מים שאל חלב נתנה בספל אדירים הקריבה חמאה:

בין רגליה כרע נפל שכב בין רגליה כרע נפל באשר כרע שם נפל שדוד:

חכמות שרותיה תענינה אף היא תשיב אמריה לה:

כן יאבדו כל אויביך יהוה ואהביו כצאת השמש בגברתו ותשקט הארץ ארבעים שנה:

ותתפלל חנה ותאמר עלץ לבי ביהוה רמה קרני ביהוה רחב פי על אויבי כי שמחתי בישועתך:

אל תרבו תדברו גבהה גבהה יצא עתק מפיכם כי אל דעות יהוה ולא נתכנו עללות:

שבעים בלחם נשכרו ורעבים חדלו עד עקרה ילדה שבעה ורבת בנים אמללה:

יהוה מוריש ומעשיר משפיל אף מרומם:

רגלי חסידו ישמר ורשעים בחשך ידמו כי לא בכח יגבר איש:

למנצח לעבד יהוה לדוד אשר דבר ליהוה את דברי השירה הזאת ביום הציל יהוה אותו מכף כל איביו ומיד שאול ויאמר ארחמך יהוה חזקי:

הפכת מספדי למחול לי פתחת שקי ותאזרני שמחה:

למען יזמרך כבוד ולא ידם יהוה אלהי לעולם אודך:

אולים מדרך פשעם ומעונתיהם יתענו:

ויזעקו אל יהוה בצר להם ממצקותיהם יושיעם:

יודו ליהוה חסדו ונפלאותיו לבני אדם:

אהבתי כי ישמע יהוה את קולי תחנוני:

אפפוני חבלי מות ומצרי שאול מצאוני צרה ויגון אמצא:

יסר יסרני יה ולמות לא נתנני:

פתחו לי שערי צדק אבא בם אודה יה:

ויתפלל יונה אל יהוה אלהיו ממעי הדגה:

ותשליכני מצולה בלבב ימים ונהר יסבבני כל משבריך וגליך עלי עברו:

אפפוני מים עד נפש תהום יסבבני סוף חבוש לראשי:

בהתעטף עלי נפשי את יהוה זכרתי ותבוא אליך תפלתי אל היכל קדשך:

ואני בקול תודה אזבחה לך אשר נדרתי אשלמה ישועתה ליהוה:

ראו עתה כי אני אני הוא ואין אלהים עמדי אני אמית ואחיה מחצתי ואני ארפא ואין מידי מציל:

יהוה ממית ומחיה מוריד שאול ויעל:

כי הוא יכאיב ויחבש ימחץ וידו תרפינה:

לכו ונשובה אל יהוה כי הוא טרף וירפאנו יך ויחבשנו:

יחינו מימים ביום השלישי יקמנו ונחיה לפניו: