כי חיים הם למצאיהם ולכל בשרו מרפא:

צוף דבש אמרי נעם מתוק לנפש ומרפא לעצם:

הרפא לשבורי לב ומחבש לעצבותם:

מכף רגל ועד ראש אין בו מתם פצע וחבורה ומכה טריה לא זרו ולא חבשו ולא רככה בשמן:

כי כה אמר יהוה אנוש לשברך נחלה מכתך:

אין דן דינך למזור רפאות תעלה אין לך:

ומולדותיך ביום הולדת אתך לא כרת שרך ובמים לא רחצת למשעי והמלח לא המלחת והחתל לא חתלת:

לא חסה עליך עין לעשות לך אחת מאלה לחמלה עליך ותשלכי אל פני השדה בגעל נפשך ביום הלדת אתך:

עטיניו מלאו חלב ומח עצמותיו ישקה: