יש מפזר ונוסף עוד וחושך מישר אך למחסור:

נפש ברכה תדשן ומרוה גם הוא יורא:

מלוה יהוה חונן דל וגמלו ישלם לו:

טוב עין הוא יברך כי נתן מלחמו לדל:

את שבתתי תשמרו ומקדשי תיראו אני יהוה:

ונתתי גשמיכם בעתם ונתנה הארץ יבולה ועץ השדה יתן פריו:

יצו יהוה אתך את הברכה באסמיך ובכל משלח ידך וברכך בארץ אשר יהוה אלהיך נתן לך:

שלח לחמך על פני המים כי ברב הימים תמצאנו:

תן חלק לשבעה וגם לשמונה כי לא תדע מה יהיה רעה על הארץ:

העוד הזרע במגורה ועד הגפן והתאנה והרמון ועץ הזית לא נשא מן היום הזה אברך:

הביאו את כל המעשר אל בית האוצר ויהי טרף בביתי ובחנוני נא בזאת אמר יהוה צבאות אם לא אפתח לכם את ארבות השמים והריקתי לכם ברכה עד בלי די:

וגערתי לכם באכל ולא ישחת לכם את פרי האדמה ולא תשכל לכם הגפן בשדה אמר יהוה צבאות:

והמשקה את אחד הקטנים האלה רק כוס מים קרים לשם תלמיד אמן אמר אני לכם כי לא יאבד שכרו:

כי הנה הזרע בצמצום גם יקצר בצמצום והזרע בברכות גם יקצר בברכות:

ואלהים יכל להשפיע עליכם כל חסד עד כי יהיה לכם בכל עת די ספוקכם בכל ותותירו בכל מעשה טוב:

והנתן זרע לזרע ולחם לאכל יתן וירבה את זרעכם ויפריא תנובות צדקתכם: