עוונותיו ילכדנו את הרשע ובחבלי חטאתו יתמך:

הוא ימות באין מוסר וברב אולתו ישגה:

מתחת שרשיו יבשו וממעל ימל קצירו:

יהדפהו מאור אל חשך ומתבל ינדהו:

כי ליום איד יחשך רע ליום עברות יובלו:

כי רשעים יאבדו ואיבי יהוה כיקר כרים כלו בעשן כלו:

כי מברכיו יירשו ארץ ומקלליו יכרתו:

כי יהוה אהב משפט ולא יעזב את חסידיו לעולם נשמרו וזרע רשעים נכרת:

שמר תם וראה ישר כי אחרית לאיש שלום:

ופשעים נשמדו יחדו אחרית רשעים נכרתה:

גם אל יתצך לנצח יחתך ויסחך מאהל ושרשך מארץ חיים סלה:

יתמו חטאים מן הארץ ורשעים עוד אינם ברכי נפשי את יהוה הללו יה:

שומר יהוה את כל אהביו ואת כל הרשעים ישמיד:

אמרו צדיק כי טוב כי פרי מעלליהם יאכלו:

אוי לרשע רע כי גמול ידיו יעשה לו:

ונשל יהוה אלהיך את הגוים האל מפניך מעט מעט לא תוכל כלתם מהר פן תרבה עליך חית השדה:

והפיצך יהוה בכל העמים מקצה הארץ ועד קצה הארץ ועבדת שם אלהים אחרים אשר לא ידעת אתה ואבתיך עץ ואבן: