למה יהוה תעמד ברחוק תעלים לעתות בצרה:

ראיתה יהוה אל תחרש אדני אל תרחק ממני:

רחוק יהוה מרשעים ותפלת צדיקים ישמע:

כי אם עונתיכם היו מבדלים בינכם לבין אלהיכם וחטאותיכם הסתירו פנים מכם משמוע:

כי אם יגדלו את בניהם ושכלתים מאדם כי גם אוי להם בשורי מהם:

עלת תמיד לדרתיכם פתח אהל מועד לפני יהוה אשר אועד לכם שמה לדבר אליך שם:

ונעדתי שמה לבני ישראל ונקדש בכבדי:

ובקשתם משם את יהוה אלהיך ומצאת כי תדרשנו בכל לבבך ובכל נפשך:

ויהי רעב בימי דוד שלש שנים שנה אחרי שנה ויבקש דוד את פני יהוה ויאמר יהוה אל שאול ואל בית הדמים על אשר המית את הגבענים:

לך אמר לבי בקשו פני את פניך יהוה אבקש:

דרשו יהוה בהמצאו קראהו בהיותו קרוב:

יעזב רשע דרכו ואיש און מחשבתיו וישב אל יהוה וירחמהו ואל אלהינו כי ירבה לסלוח:

שאלו וינתן לכם דרשו ותמצאו דפקו ויפתח לכם:

כי כל השאל יקבל והדרש ימצא והדפק יפתח לו:

כי הבהמות אשר הובא דמן בקדש לכפרת החטא על ידי הכהן הגדול גויתיהן נשרפו מחוץ למחנה:

לכן נצאה נא אליו אל מחוץ למחנה ונשא את חרפתו: