ואת שוק הימין תתנו תרומה לכהן מזבחי שלמיכם:

כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל:

ואת חזה התנופה ואת שוק התרומה תאכלו במקום טהור אתה ובניך ובנתיך אתך כי חקך וחק בניך נתנו מזבחי שלמי בני ישראל:

שוק התרומה וחזה התנופה על אשי החלבים יביאו להניף תנופה לפני יהוה והיה לך ולבניך אתך לחק עולם כאשר צוה יהוה:

וזה יהיה משפט הכהנים מאת העם מאת זבחי הזבח אם שור אם שה ונתן לכהן הזרע והלחיים והקבה:

וקדשת את חזה התנופה ואת שוק התרומה אשר הונף ואשר הורם מאיל המלאים מאשר לאהרן ומאשר לבניו:

והקריב ממנו אחד מכל קרבן תרומה ליהוה לכהן הזרק את דם השלמים לו יהיה:

כי את חזה התנופה ואת שוק התרומה לקחתי מאת בני ישראל מזבחי שלמיהם ואתן אתם לאהרן הכהן ולבניו לחק עולם מאת בני ישראל:

והיה באכלכם מלחם הארץ תרימו תרומה ליהוה:

ראשית ערסתכם חלה תרימו תרומה כתרומת גרן כן תרימו אתה:

כי את מעשר בני ישראל אשר ירימו ליהוה תרומה נתתי ללוים לנחלה על כן אמרתי להם בתוך בני ישראל לא ינחלו נחלה:

מכל מתנתיכם תרימו את כל תרומת יהוה מכל חלבו את מקדשו ממנו:

ממחציתם תקחו ונתתה לאלעזר הכהן תרומת יהוה:

ויתן משה את מכס תרומת יהוה לאלעזר הכהן כאשר צוה יהוה את משה:

ואם זבח שלמים קרבנו אם מן הבקר הוא מקריב אם זכר אם נקבה תמים יקריבנו לפני יהוה:

וזאת תורת זבח השלמים אשר יקריב ליהוה:

על חלת לחם חמץ יקריב קרבנו על זבח תודת שלמיו:

ובשר זבח תודת שלמיו ביום קרבנו יאכל לא יניח ממנו עד בקר:

והנותר מבשר הזבח ביום השלישי באש ישרף:

והבשר אשר יגע בכל טמא לא יאכל באש ישרף והבשר כל טהור יאכל בשר:

ונפש כי תגע בכל טמא בטמאת אדם או בבהמה טמאה או בכל שקץ טמא ואכל מבשר זבח השלמים אשר ליהוה ונכרתה הנפש ההוא מעמיה:

דבר אל בני ישראל לאמר כל חלב שור וכשב ועז לא תאכלו:

כי כל אכל חלב מן הבהמה אשר יקריב ממנה אשה ליהוה ונכרתה הנפש האכלת מעמיה:

כל נפש אשר תאכל כל דם ונכרתה הנפש ההוא מעמיה:

דבר אל בני ישראל לאמר המקריב את זבח שלמיו ליהוה יביא את קרבנו ליהוה מזבח שלמיו:

והקטיר הכהן את החלב המזבחה והיה החזה לאהרן ולבניו:

המקריב את דם השלמים ואת החלב מבני אהרן לו תהיה שוק הימין למנה:

זאת משחת אהרן ומשחת בניו מאשי יהוה ביום הקריב אתם לכהן ליהוה:

זאת התורה לעלה למנחה ולחטאת ולאשם ולמלואים ולזבח השלמים: