וכי יכה איש את עבדו או את אמתו בשבט ומת תחת ידו נקם ינקם:

לא תטה משפט לא תכיר פנים ולא תקח שחד כי השחד יעור עיני חכמים ויסלף דברי צדיקם:

ועתה כבשר אחינו בשרנו כבניהם בנינו והנה אנחנו כבשים את בנינו ואת בנתינו לעבדים ויש מבנתינו נכבשות ואין לאל ידנו ושדתינו וכרמינו לאחרים:

אם אמאס משפט עבדי ואמתי ברבם עמדי:

הלא בבטן עשני עשהו ויכננו ברחם אחד:

כי דרש דמים אותם זכר לא שכח צעקת עניים:

ראתה כי אתה עמל וכעס תביט לתת בידך עליך יעזב חלכה יתום אתה היית עוזר:

לשפט יתום ודך בל יוסיף עוד לערץ אנוש מן הארץ:

כי יציל אביון משוע ועני ואין עזר לו:

מתוך ומחמס יגאל נפשם וייקר דמם בעיניו:

אל תגזל דל כי דל הוא ואל תדכא עני בשער:

כי יהוה יריב ריבם וקבע את קבעיהם נפש:

ואתם האדנים ככה תעשו גם להם חדלו מגער בם וידעתם כי גם עליכם יש אדון בשמים ואין לפניו משא פנים:

אתם האדנים תנו לעבדיכם הישר והשוה ודעו כי גם אתם יש לכם אדון בשמים: