אבוא ביתך בעולות אשלם לך נדרי:

עלות מחים אעלה לך עם קטרת אילים אעשה בקר עם עתודים סלה:

ויזבחו זבחי תודה ויספרו מעשיו ברנה:

לך אזבח זבח תודה ובשם יהוה אקרא:

והבאתם שמה עלתיכם וזבחיכם ואת מעשרתיכם ואת תרומת ידכם ונדריכם ונדבתיכם ובכרת בקרכם וצאנכם:

ואכלתם שם לפני יהוה אלהיכם ושמחתם בכל משלח ידכם אתם ובתיכם אשר ברכך יהוה אלהיך:

אודה יהוה כצדקו ואזמרה שם יהוה עליון:

רומה יהוה בעזך נשירה ונזמרה גבורתך:

אך צדיקים יודו לשמך ישבו ישרים את פניך:

אודך לעולם כי עשית ואקוה שמך כי טוב נגד חסידיך:

מזמור שיר ליום השבת טוב להדות ליהוה ולזמר לשמך עליון:

הללו יה כי טוב זמרה אלהינו כי נעים נאוה תהלה: