יהוה בהיכל קדשו יהוה בשמים כסאו עיניו יחזו עפעפיו יבחנו בני אדם:

משמים הביט יהוה ראה את כל בני האדם:

ממכון שבתו השגיח אל כל ישבי הארץ:

כי השקיף ממרום קדשו יהוה משמים אל ארץ הביט:

כי עיני על כל דרכיהם לא נסתרו מלפני ולא נצפן עונם מנגד עיני:

אם יסתר איש במסתרים ואני לא אראנו נאם יהוה הלוא את השמים ואת הארץ אני מלא נאם יהוה:

ראשית חכמה יראת יהוה שכל טוב לכל עשיהם תהלתו עמדת לעד:

ושמרתם ועשיתם כי הוא חכמתכם ובינתכם לעיני העמים אשר ישמעון את כל החקים האלה ואמרו רק עם חכם ונבון הגוי הגדול הזה:

ויאמר לאדם הן יראת אדני היא חכמה וסור מרע בינה:

רשע כגבה אפו בל ידרש אין אלהים כל מזמותיו:

לך אמר לבי בקשו פני את פניך יהוה אבקש:

ואתה שלמה בני דע את אלהי אביך ועבדהו בלב שלם ובנפש חפצה כי כל לבבות דורש יהוה וכל יצר מחשבות מבין אם תדרשנו ימצא לך ואם תעזבנו יזניחך לעד:

ויצא לפני אסא ויאמר לו שמעוני אסא וכל יהודה ובנימן יהוה עמכם בהיותכם עמו ואם תדרשהו ימצא לכם ואם תעזבהו יעזב אתכם:

אבל דברים טובים נמצאו עמך כי בערת האשרות מן הארץ והכינות לבבך לדרש האלהים:

דרשו יהוה בהמצאו קראהו בהיותו קרוב: