ויושע יהוה ביום ההוא את ישראל מיד מצרים וירא ישראל את מצרים מת על שפת הים:

אמר אויב ארדף אשיג אחלק שלל תמלאמו נפשי אריק חרבי תורישמו ידי:

נשפת ברוחך כסמו ים צללו כעופרת במים אדירים:

ואשר עשה לחיל מצרים לסוסיו ולרכבו אשר הציף את מי ים סוף על פניהם ברדפם אחריכם ויאבדם יהוה עד היום הזה:

והים בקעת לפניהם ויעברו בתוך הים ביבשה ואת רדפיהם השלכת במצולת כמו אבן במים עזים:

יאמרו גאולי יהוה אשר גאלם מיד צר:

ויפרקנו מצרינו כי לעולם חסדו:

נחית בחסדך עם זו גאלת נהלת בעזך אל נוה קדשך:

הכי אמרתי הבו לי ומכחכם שחדו בעדי:

ומלטוני מיד צר ומיד עריצים תפדוני:

כי העלתיך מארץ מצרים ומבית עבדים פדיתיך ואשלח לפניך את משה אהרן ומרים: