חטאתי מה אפעל לך נצר האדם למה שמתני למפגע לך ואהיה עלי למשא:

יסגירני אל אל עויל ועל ידי רשעים ירטני:

יסבו עלי רביו יפלח כליותי ולא יחמול ישפך לארץ מררתי:

אף זנחת ותכלימנו ולא תצא בצבאותינו:

תתננו כצאן מאכל ובגוים זריתנו:

תשימנו חרפה לשכנינו לעג וקלס לסביבותינו:

כי בחנתנו אלהים צרפתנו כצרף כסף:

הרכבת אנוש לראשנו באנו באש ובמים ותוציאנו לרויה:

כי שלח ברשת ברגליו ועל שבכה יתהלך:

טמון בארץ חבלו ומלכדתו עלי נתיב:

לוא אליכם כל עברי דרך הביטו וראו אם יש מכאוב כמכאבי אשר עולל לי אשר הוגה יהוה ביום חרון אפו:

ממרום שלח אש בעצמתי וירדנה פרש רשת לרגלי השיבני אחור נתנני שממה כל היום דוה:

ופרשתי את רשתי עליו ונתפש במצודתי והבאתי אתו בבלה ארץ כשדים ואותה לא יראה ושם ימות:

כה אמר אדני יהוה ופרשתי עליך את רשתי בקהל עמים רבים והעלוך בחרמי:

כאשר ילכו אפרוש עליהם רשתי כעוף השמים אורידם איסרם כשמע לעדתם: