ויט משה את ידו על הים ויולך יהוה את הים ברוח קדים עזה כל הלילה וישם את הים לחרבה ויבקעו המים:

ויבאו בני ישראל בתוך הים ביבשה והמים להם חמה מימינם ומשמאלם:

ויט משה את ידו על הים וישב הים לפנות בקר לאיתנו ומצרים נסים לקראתו וינער יהוה את מצרים בתוך הים:

וישבו המים ויכסו את הרכב ואת הפרשים לכל חיל פרעה הבאים אחריהם בים לא נשאר בהם עד אחד:

הפך ים ליבשה בנהר יעברו ברגל שם נשמחה בו:

בקע ים ויעבירם ויצב מים כמו נד:

הים ראה וינס הירדן יסב לאחור:

מה לך הים כי תנוס הירדן תסב לאחור:

לגזר ים סוף לגזרים כי לעולם חסדו:

ונער פרעה וחילו בים סוף כי לעולם חסדו:

ויזכר ימי עולם משה עמו איה המעלם מים את רעי צאנו איה השם בקרבו את רוח קדשו:

מוליכם בתהמות כסוס במדבר לא יכשלו:

אז ישיר משה ובני ישראל את השירה הזאת ליהוה ויאמרו לאמר אשירה ליהוה כי גאה גאה סוס ורכבו רמה בים:

יהוה איש מלחמה יהוה שמו:

תהמת יכסימו ירדו במצולת כמו אבן:

וברב גאונך תהרס קמיך תשלח חרנך יאכלמו כקש:

אמר אויב ארדף אשיג אחלק שלל תמלאמו נפשי אריק חרבי תורישמו ידי:

מי כמכה באלם יהוה מי כמכה נאדר בקדש נורא תהלת עשה פלא:

נחית בחסדך עם זו גאלת נהלת בעזך אל נוה קדשך:

אז נבהלו אלופי אדום אילי מואב יאחזמו רעד נמגו כל ישבי כנען:

תבאמו ותטעמו בהר נחלתך מכון לשבתך פעלת יהוה מקדש אדני כוננו ידיך:

כי בא סוס פרעה ברכבו ובפרשיו בים וישב יהוה עלהם את מי הים ובני ישראל הלכו ביבשה בתוך הים:

ותען להם מרים שירו ליהוה כי גאה גאה סוס ורכבו רמה בים:

ויגער בים סוף ויחרב ויוליכם בתהמות כמדבר:

ויכסו מים צריהם אחד מהם לא נותר:

באמונה עברו את ים סוף ביבשה אשר נסו מצרים גם המה לעבר בו ויטבעו:

תהמת יכסימו ירדו במצולת כמו אבן:

נשפת ברוחך כסמו ים צללו כעופרת במים אדירים:

וישא מלאך נורא אבן גדולה כפלח רכב וישליכה אל תוך הים לאמר ככה תשלך במערצה בבל העיר הגדולה ולא תמצא עוד: