ויהי ליהושפט עשר וכבוד לרב ויתחתן לאחאב:

ויגדל יהוה את שלמה למעלה לעיני כל ישראל ויתן עליו הוד מלכות אשר לא היה על כל מלך לפניו על ישראל:

והערים אשר נתן חורם לשלמה בנה שלמה אתם ויושב שם את בני ישראל:

ויבן את תדמר במדבר ואת כל ערי המסכנות אשר בנה בחמת:

ואת בעלת ואת כל ערי המסכנות אשר היו לשלמה ואת כל ערי הרכב ואת ערי הפרשים ואת כל חשק שלמה אשר חשק לבנות בירושלם ובלבנון ובכל ארץ ממשלתו:

וישב רחבעם בירושלם ויבן ערים למצור ביהודה:

ואת בית צור ואת שוכו ואת עדלם:

ואת אדורים ואת לכיש ואת עזקה:

ויחזק את המצרות ויתן בהם נגידים ואצרות מאכל ושמן ויין:

ויבן ערי מצורה ביהודה כי שקטה הארץ ואין עמו מלחמה בשנים האלה כי הניח יהוה לו:

ויאמר ליהודה נבנה את הערים האלה ונסב חומה ומגדלים דלתים ובריחים עודנו הארץ לפנינו כי דרשנו את יהוה אלהינו דרשנו וינח לנו מסביב ויבנו ויצליחו:

ויצא וילחם בפלשתים ויפרץ את חומת גת ואת חומת יבנה ואת חומת אשדוד ויבנה ערים באשדוד ובפלשתים:

ויתנו העמונים מנחה לעזיהו וילך שמו עד לבוא מצרים כי החזיק עד למעלה:

וערים בנה בהר יהודה ובחרשים בנה בירניות ומגדלים:

ויתחזק ויבן את כל החומה הפרוצה ויעל על המגדלות ולחוצה החומה אחרת ויחזק את המלוא עיר דויד ויעש שלח לרב ומגנים:

ויהי ליחזקיהו עשר וכבוד הרבה מאד ואצרות עשה לו לכסף ולזהב ולאבן יקרה ולבשמים ולמגנים ולכל כלי חמדה:

וערים עשה לו ומקנה צאן ובקר לרב כי נתן לו אלהים רכוש רב מאד: