היום הזה יסגרך יהוה בידי והכיתך והסרתי את ראשך מעליך ונתתי פגר מחנה פלשתים היום הזה לעוף השמים ולחית הארץ וידעו כל הארץ כי יש אלהים לישראל:

ועתה יהוה אלהינו הושיענו נא מידו וידעו כל ממלכות הארץ כי אתה יהוה אלהים לבדך:

ואתה תשמע מן השמים ממכון שבתך ועשית ככל אשר יקרא אליך הנכרי למען ידעו כל עמי הארץ את שמך וליראה אתך כעמך ישראל ולדעת כי שמך נקרא על הבית הזה אשר בניתי:

יזכרו וישבו אל יהוה כל אפסי ארץ וישתחוו לפניך כל משפחות גוים:

לדעת בארץ דרכך בכל גוים ישועתך:

מלכי תרשיש ואיים מנחה ישיבו מלכי שבא וסבא אשכר יקריבו:

וישתחוו לו כל מלכים כל גוים יעבדוהו:

כל גוים אשר עשית יבואו וישתחוו לפניך אדני ויכבדו לשמך:

לא ירעו ולא ישחיתו בכל הר קדשי כי מלאה הארץ דעה את יהוה כמים לים מכסים:

והמלאך השביעי תקע בשופר ויהי קלות גדולים בשמים ויאמרו הנה ממלכת העולם היתה לאדיניו ולמשיחו והוא ימלך לעולמי עולמים:

וייראו גוים את שם יהוה וכל מלכי הארץ את כבודך:

הללו את יהוה כל גוים שבחוהו כל האמים:

כי גבר עלינו חסדו ואמת יהוה לעולם הללו יה: