כי תשיתהו ברכות לעד תחדהו בשמחה את פניך:

יהי שמו לעולם לפני שמש ינין שמו ויתברכו בו כל גוים יאשרוהו:

ועתה חי יהוה אשר הכינני ויושיביני על כסא דוד אבי ואשר עשה לי בית כאשר דבר כי היום יומת אדניהו:

ושבו דמיהם בראש יואב ובראש זרעו לעלם ולדוד ולזרעו ולביתו ולכסאו יהיה שלום עד עולם מעם יהוה:

ויעל בניהו בן יהוידע ויפגע בו וימתהו ויקבר בביתו במדבר:

הגו רשע לפני מלך ויכון בצדק כסאו:

כי ילד ילד לנו בן נתן לנו ותהי המשרה על שכמו ויקרא שמו פלא יועץ אל גבור אביעד שר שלום:

למרבה המשרה ולשלום אין קץ על כסא דוד ועל ממלכתו להכין אתה ולסעדה במשפט ובצדקה מעתה ועד עולם קנאת יהוה צבאות תעשה זאת: