המלאך הגאל אתי מכל רע יברך את הנערים ויקרא בהם שמי ושם אבתי אברהם ויצחק וידגו לרב בקרב הארץ:

וישבע המלך ויאמר חי יהוה אשר פדה את נפשי מכל צרה:

בידך אפקיד רוחי פדיתה אותי יהוה אל אמת:

אגילה ואשמחה בחסדך אשר ראית את עניי ידעת בצרות נפשי:

זה עני קרא ויהוה שמע ומכל צרותיו הושיעו:

חנה מלאך יהוה סביב ליראיו ויחלצם:

צעקו ויהוה שמע ומכל צרותם הצילם:

פודה יהוה נפש עבדיו ולא יאשמו כל החסים בו:

תרננה שפתי כי אזמרה לך ונפשי אשר פדית:

הגואל משחת חייכי המעטרכי חסד ורחמים:

ויושיעם מיד שונא ויגאלם מיד אויב:

יאמרו גאולי יהוה אשר גאלם מיד צר:

אבל האדון הוא עזרני וחזקני למען תשלם על ידי הבשורה וישמעוה כל הגוים ואנצל מפי אריה:

ויצילני האדון מכל מעשה רע ויושיעני אל מלכותו שבשמים לו הכבוד לעולמי עולמים אמן: