ויירא ויאמר מה נורא המקום הזה אין זה כי אם בית אלהים וזה שער השמים:

ויעתק משם ההרה מקדם לבית אל ויט אהלה בית אל מים והעי מקדם ויבן שם מזבח ליהוה ויקרא בשם יהוה:

ויטע אשל בבאר שבע ויקרא שם בשם יהוה אל עולם:

ויצב שם מזבח ויקרא לו אל אלהי ישראל:

ויאמר אלהים אל יעקב קום עלה בית אל ושב שם ועשה שם מזבח לאל הנראה אליך בברחך מפני עשו אחיך:

ויקרא יעקב את שם המקום אשר דבר אתו שם אלהים בית אל:

וברוך אל עליון אשר מגן צריך בידך ויתן לו מעשר מכל:

וכל מעשר הארץ מזרע הארץ מפרי העץ ליהוה הוא קדש ליהוה:

וכל מעשר בקר וצאן כל אשר יעבר תחת השבט העשירי יהיה קדש ליהוה:

עשר תעשר את כל תבואת זרעך היצא השדה שנה שנה:

ואכלת לפני יהוה אלהיך במקום אשר יבחר לשכן שמו שם מעשר דגנך תירשך ויצהרך ובכרת בקרך וצאנך למען תלמד ליראה את יהוה אלהיך כל הימים: