MHB - Bíblia hebraica moderna (consoantes) 2010Oseas capítulo 13tag:/bibliafeativa.com.br,2026-06-27:202606272026-06-27T16:18:06+00:00Oseas capítulo 13tag:/bibliafeativa.com.br,2026-06-27:202606272026-06-27T16:18:06+00:00
כדבר אפרים רתת נשא הוא בישראל ויאשם בבעל וימת:
ועתה יוספו לחטא ויעשו להם מסכה מכספם כתבונם עצבים מעשה חרשים כלה להם הם אמרים זבחי אדם עגלים ישקון:
לכן יהיו כענן בקר וכטל משכים הלך כמץ יסער מגרן וכעשן מארבה:
ואנכי יהוה אלהיך מארץ מצרים ואלהים זולתי לא תדע ומושיע אין בלתי:
אני ידעתיך במדבר בארץ תלאבות:
כמרעיתם וישבעו שבעו וירם לבם על כן שכחוני:
ואהי להם כמו שחל כנמר על דרך אשור:
אפגשם כדב שכול ואקרע סגור לבם ואכלם שם כלביא חית השדה תבקעם:
שחתך ישראל כי בי בעזרך:
אהי מלכך אפוא ויושיעך בכל עריך ושפטיך אשר אמרת תנה לי מלך ושרים:
אתן לך מלך באפי ואקח בעברתי:
צרור עון אפרים צפונה חטאתו:
חבלי יולדה יבאו לו הוא בן לא חכם כי עת לא יעמד במשבר בנים:
מיד שאול אפדם ממות אגאלם אהי דבריך מות אהי קטבך שאול נחם יסתר מעיני:
כי הוא בין אחים יפריא יבוא קדים רוח יהוה ממדבר עלה ויבוש מקורו ויחרב מעינו הוא ישסה אוצר כל כלי חמדה:
תאשם שמרון כי מרתה באלהיה בחרב יפלו עלליהם ירטשו והריותיו יבקעו:
Bíbliaadmin@/bibliafeativa.com.br