https://bibliafeativa.com.br/media/com_zefaniabible/images/bible_100.jpg https://bibliafeativa.com.br/es/acf/standard/mhb/19-psalm/118-chapter?ord=062726 https://bibliafeativa.com.br/es/acf/standard/mhb/19-psalm/118-chapter?ord=062726 Zefania Bible es-es Bíblia Salmos capítulo 118 https://bibliafeativa.com.br/es/acf/standard/mhb/19-psalm/118-chapter?ord=062726 https://bibliafeativa.com.br/es/acf/standard/mhb/19-psalm/118-chapter?ord=062726 Sat, 27 Jun 2026 06:46:37 +0000 הודו ליהוה כי טוב כי לעולם חסדו: יאמר נא ישראל כי לעולם חסדו: יאמרו נא בית אהרן כי לעולם חסדו: יאמרו נא יראי יהוה כי לעולם חסדו: מן המצר קראתי יה ענני במרחב יה: יהוה לי לא אירא מה יעשה לי אדם: יהוה לי בעזרי ואני אראה בשנאי: טוב לחסות ביהוה מבטח באדם: טוב לחסות ביהוה מבטח בנדיבים: כל גוים סבבוני בשם יהוה כי אמילם: סבוני גם סבבוני בשם יהוה כי אמילם: סבוני כדבורים דעכו כאש קוצים בשם יהוה כי אמילם: דחה דחיתני לנפל ויהוה עזרני: עזי וזמרת יה ויהי לי לישועה: קול רנה וישועה באהלי צדיקים ימין יהוה עשה חיל: ימין יהוה רוממה ימין יהוה עשה חיל: לא אמות כי אחיה ואספר מעשי יה: יסר יסרני יה ולמות לא נתנני: פתחו לי שערי צדק אבא בם אודה יה: זה השער ליהוה צדיקים יבאו בו: אודך כי עניתני ותהי לי לישועה: אבן מאסו הבונים היתה לראש פנה: מאת יהוה היתה זאת היא נפלאת בעינינו: זה היום עשה יהוה נגילה ונשמחה בו: אנא יהוה הושיעה נא אנא יהוה הצליחה נא: ברוך הבא בשם יהוה ברכנוכם מבית יהוה: אל יהוה ויאר לנו אסרו חג בעבתים עד קרנות המזבח: אלי אתה ואודך אלהי ארוממך: הודו ליהוה כי טוב כי לעולם חסדו: