MHB - Bíblia hebraica moderna (consoantes) 20102 Crónicas capítulo 17tag:/bibliafeativa.com.br,2026-06-27:202606272026-06-27T05:41:30+00:002 Crónicas capítulo 17tag:/bibliafeativa.com.br,2026-06-27:202606272026-06-27T05:41:30+00:00
וימלך יהושפט בנו תחתיו ויתחזק על ישראל:
ויתן חיל בכל ערי יהודה הבצרות ויתן נציבים בארץ יהודה ובערי אפרים אשר לכד אסא אביו:
ויהי יהוה עם יהושפט כי הלך בדרכי דויד אביו הראשנים ולא דרש לבעלים:
כי לאלהי אביו דרש ובמצותיו הלך ולא כמעשה ישראל:
ויכן יהוה את הממלכה בידו ויתנו כל יהודה מנחה ליהושפט ויהי לו עשר וכבוד לרב:
ויגבה לבו בדרכי יהוה ועוד הסיר את הבמות ואת האשרים מיהודה:
ובשנת שלוש למלכו שלח לשריו לבן חיל ולעבדיה ולזכריה ולנתנאל ולמיכיהו ללמד בערי יהודה:
ועמהם הלוים שמעיהו ונתניהו וזבדיהו ועשהאל ושמרימות ויהונתן ואדניהו וטוביהו וטוב אדוניה הלוים ועמהם אלישמע ויהורם הכהנים:
וילמדו ביהודה ועמהם ספר תורת יהוה ויסבו בכל ערי יהודה וילמדו בעם:
ויהי פחד יהוה על כל ממלכות הארצות אשר סביבות יהודה ולא נלחמו עם יהושפט:
ומן פלשתים מביאים ליהושפט מנחה וכסף משא גם הערביאים מביאים לו צאן אילים שבעת אלפים ושבע מאות ותישים שבעת אלפים ושבע מאות:
ויהי יהושפט הלך וגדל עד למעלה ויבן ביהודה בירניות וערי מסכנות:
ומלאכה רבה היה לו בערי יהודה ואנשי מלחמה גבורי חיל בירושלם:
ואלה פקדתם לבית אבותיהם ליהודה שרי אלפים עדנה השר ועמו גבורי חיל שלש מאות אלף:
ועל ידו יהוחנן השר ועמו מאתים ושמונים אלף:
ועל ידו עמסיה בן זכרי המתנדב ליהוה ועמו מאתים אלף גבור חיל:
ומן בנימן גבור חיל אלידע ועמו נשקי קשת ומגן מאתים אלף:
ועל ידו יהוזבד ועמו מאה ושמונים אלף חלוצי צבא:
אלה המשרתים את המלך מלבד אשר נתן המלך בערי המבצר בכל יהודה:
Bíbliaadmin@/bibliafeativa.com.br