10
כי תקרב אל עיר להלחם עליה וקראת אליה לשלום:
11
והיה אם שלום תענך ופתחה לך והיה כל העם הנמצא בה יהיו לך למס ועבדוך:
12
ואם לא תשלים עמך ועשתה עמך מלחמה וצרת עליה:
13
ונתנה יהוה אלהיך בידך והכית את כל זכורה לפי חרב:
14
רק הנשים והטף והבהמה וכל אשר יהיה בעיר כל שללה תבז לך ואכלת את שלל איביך אשר נתן יהוה אלהיך לך:
15
כן תעשה לכל הערים הרחקת ממך מאד אשר לא מערי הגוים האלה הנה:
16
רק מערי העמים האלה אשר יהוה אלהיך נתן לך נחלה לא תחיה כל נשמה:
