למנצח מזמור לדוד עד אנה יהוה תשכחני נצח עד אנה תסתיר את פניך ממני:

למה פניך תסתיר תשכח ענינו ולחצנו:

משכיל לאסף למה אלהים זנחת לנצח יעשן אפך בצאן מרעיתך:

הלעולמים יזנח אדני ולא יסיף לרצות עוד:

השכח חנות אל אם קפץ באף רחמיו סלה:

עד מה יהוה תאנף לנצח תבער כמו אש קנאתך:

הלעולם תאנף בנו תמשך אפך לדר ודר:

עד מה יהוה תסתר לנצח תבער כמו אש חמתך:

עד מתי רשעים יהוה עד מתי רשעים יעלזו:

יביעו ידברו עתק יתאמרו כל פעלי און:

אל תקצף יהוה עד מאד ואל לעד תזכר עון הן הבט נא עמך כלנו:

בית קדשנו ותפארתנו אשר הללוך אבתינו היה לשרפת אש וכל מחמדינו היה לחרבה:

המאס מאסת את יהודה אם בציון געלה נפשך מדוע הכיתנו ואין לנו מרפא קוה לשלום ואין טוב ולעת מרפא והנה בעתה:

אל תנאץ למען שמך אל תנבל כסא כבודך זכר אל תפר בריתך אתנו: