ימים על ימי מלך תוסיף שנותיו כמו דר ודר:

ישב עולם לפני אלהים חסד ואמת מן ינצרהו:

חסד ואמת נפגשו צדק ושלום נשקו:

משכיל לאיתן האזרחי חסדי יהוה עולם אשירה לדר ודר אודיע אמונתך בפי:

כי אמרתי עולם חסד יבנה שמים תכן אמונתך בהם:

צדק ומשפט מכון כסאך חסד ואמת יקדמו פניך:

חסד ואמת יצרו מלך וסעד בחסד כסאו:

מלך שופט באמת דלים כסאו לעד יכון:

וירם לנו קרן ישועה בבית דוד עבדו:

ישועה מאיבינו ומיד כל שנאינו:

את השבועה אשר נשבע לאברהם אבינו:

בתמים ובצדקה לפניו כל ימי חיינו:

כי ילד ילד לנו בן נתן לנו ותהי המשרה על שכמו ויקרא שמו פלא יועץ אל גבור אביעד שר שלום:

למרבה המשרה ולשלום אין קץ על כסא דוד ועל ממלכתו להכין אתה ולסעדה במשפט ובצדקה מעתה ועד עולם קנאת יהוה צבאות תעשה זאת:

וישב דוד במצדה ויקרא לה עיר דוד ויבן דוד סביב מן המלוא וביתה:

ונאמן ביתך וממלכתך עד עולם לפניך כסאך יהיה נכון עד עולם:

הנה ימים באים נאם יהוה והקמתי לדוד צמח צדיק ומלך מלך והשכיל ועשה משפט וצדקה בארץ:

בימיו תושע יהודה וישראל ישכן לבטח וזה שמו אשר יקראו יהוה צדקנו:

ולה יהיב שלטן ויקר ומלכו וכל עממיא אמיא ולשניא לה יפלחון שלטנה שלטן עלם די לא יעדה ומלכותה די לא תתחבל:

ומלכותה ושלטנא ורבותא די מלכות תחות כל שמיא יהיבת לעם קדישי עליונין מלכותה מלכות עלם וכל שלטניא לה יפלחון וישתמעון:

ביום ההוא אקים את סכת דויד הנפלת וגדרתי את פרציהן והרסתיו אקים ובניתיה כימי עולם:

ושמתי את הצלעה לשארית והנהלאה לגוי עצום ומלך יהוה עליהם בהר ציון מעתה ועד עולם:

והנך הרה וילדת בן וקראת את שמו ישוע:

ועל בית יעקב ימלך לעולם ועד ולמלכותו אין קץ:

אחרי זאת אשוב ואקים את סכת דויד הנפלת והרסותיה אקים ובניתיה:

למען ידרשו שארית אדם את יהוה וכל הגוים אשר נקרא שמי עליהם נאם יהוה עשה כל אלה:

ויצא חטר מגזע ישי ונצר משרשיו יפרה:

והריחו ביראת יהוה ולא למראה עיניו ישפוט ולא למשמע אזניו יוכיח:

והיה צדק אזור מתניו והאמונה אזור חלציו:

הן לצדק ימלך מלך ולשרים למשפט ישרו:

והיה איש כמחבא רוח וסתר זרם כפלגי מים בציון כצל סלע כבד בארץ עיפה:

אמר אלהי ישראל לי דבר צור ישראל מושל באדם צדיק מושל יראת אלהים:

יהי יהוה אלהיך ברוך אשר חפץ בך לתתך על כסא ישראל באהבת יהוה את ישראל לעלם וישימך למלך לעשות משפט וצדקה:

ויעש כזאת יחזקיהו בכל יהודה ויעש הטוב והישר והאמת לפני יהוה אלהיו:

ידין עמך בצדק וענייך במשפט:

ישפט עניי עם יושיע לבני אביון וידכא עושק:

לפני יהוה כי בא כי בא לשפט הארץ ישפט תבל בצדק ועמים באמונתו:

לפני יהוה כי בא לשפט הארץ ישפט תבל בצדק ועמים במישרים:

ועז מלך משפט אהב אתה כוננת מישרים משפט וצדקה ביעקב אתה עשית:

גילי מאד בת ציון הריעי בת ירושלם הנה מלכך יבוא לך צדיק ונושע הוא עני ורכב על חמור ועל עיר בן אתנות:

אך על הבן אמר כסאך אלהים עולם ועד שבט מישר שבט מלכותך:

אהבת צדק ותשנא רשע על כן משחך אלהים אלהיך שמן ששון מחבריך:

ועתה אם כל אלה ימוגו מה מאד חיבים אתם להתהלך בקדשה ובחסידות:

ולחכות לבא יום יהוה ולהחיש אתו אשר בגללו השמים ימוגו באש והיסדות יבערו ונמסו: