את הכל עשה יפה בעתו גם את העלם נתן בלבם מבלי אשר לא ימצא האדם את המעשה אשר עשה האלהים מראש ועד סוף:

כל זה נסיתי בחכמה אמרתי אחכמה והיא רחוקה ממני:

רחוק מה שהיה ועמק עמק מי ימצאנו:

כאשר אינך יודע מה דרך הרוח כעצמים בבטן המלאה ככה לא תדע את מעשה האלהים אשר יעשה את הכל:

עשה גדלות ואין חקר נפלאות עד אין מספר:

החקר אלוה תמצא אם עד תכלית שדי תמצא:

ארכה מארץ מדה ורחבה מני ים:

רבות עשית אתה יהוה אלהי נפלאתיך ומחשבתיך אלינו אין ערך אליך אגידה ואדברה עצמו מספר:

ואחשבה לדעת זאת עמל היא בעיני:

מה רבו מעשיך יהוה כלם בחכמה עשית מלאה הארץ קנינך:

ולא למדתי חכמה ודעת קדשים אדע:

מי עלה שמים וירד מי אסף רוח בחפניו מי צרר מים בשמלה מי הקים כל אפסי ארץ מה שמו ומה שם בנו כי תדע:

הלוא ידעת אם לא שמעת אלהי עולם יהוה בורא קצות הארץ לא ייעף ולא ייגע אין חקר לתבונתו:

מה עמק עשר חכמת אלהים ועשר דעתו משפטיו מי יחקר ודרכיו מי ימצא: