היטיבה ברצונך את ציון תבנה חומות ירושלם:

כי אלהים יושיע ציון ויבנה ערי יהודה וישבו שם וירשוה:

בונה ירושלם יהוה נדחי ישראל יכנס:

והיה באחרית הימים נכון יהיה הר בית יהוה בראש ההרים ונשא מגבעות ונהרו אליו כל הגוים:

והלכו עמים רבים ואמרו לכו ונעלה אל הר יהוה אל בית אלהי יעקב וירנו מדרכיו ונלכה בארחתיו כי מציון תצא תורה ודבר יהוה מירושלם:

זאת העצה היעוצה על כל הארץ וזאת היד הנטויה על כל הגוים:

ואנכי מעשיהם ומחשבתיהם באה לקבץ את כל הגוים והלשנות ובאו וראו את כבודי:

עוד אבנך ונבנית בתולת ישראל עוד תעדי תפיך ויצאת במחול משחקים:

והשבתי את שבות יהודה ואת שבות ישראל ובנתים כבראשנה:

הגידו השמים צדקו וראו כל העמים כבודו:

קומי אורי כי בא אורך וכבוד יהוה עליך זרח:

כי הנה החשך יכסה ארץ וערפל לאמים ועליך יזרח יהוה וכבודו עליך יראה:

כל צאן קדר יקבצו לך אילי נביות ישרתונך יעלו על רצון מזבחי ובית תפארתי אפאר:

לשום לאבלי ציון לתת להם פאר תחת אפר שמן ששון תחת אבל מעטה תהלה תחת רוח כהה וקרא להם אילי הצדק מטע יהוה להתפאר:

נשי עמי תגרשון מבית תענגיה מעל עלליה תקחו הדרי לעולם:

הוי הוי ונסו מארץ צפון נאם יהוה כי כארבע רוחות השמים פרשתי אתכם נאם יהוה:

כי כה אמר יהוה צבאות אחר כבוד שלחני אל הגוים השללים אתכם כי הנגע בכם נגע בבבת עינו:

רני ושמחי בת ציון כי הנני בא ושכנתי בתוכך נאם יהוה:

ונחל יהוה את יהודה חלקו על אדמת הקדש ובחר עוד בירושלם: