27
ואלה תולדת תרח תרח הוליד את אברם את נחור ואת הרן והרן הוליד את לוט:
28
וימת הרן על פני תרח אביו בארץ מולדתו באור כשדים:
29
ויקח אברם ונחור להם נשים שם אשת אברם שרי ושם אשת נחור מלכה בת הרן אבי מלכה ואבי יסכה:
30
ותהי שרי עקרה אין לה ולד:
31
ויקח תרח את אברם בנו ואת לוט בן הרן בן בנו ואת שרי כלתו אשת אברם בנו ויצאו אתם מאור כשדים ללכת ארצה כנען ויבאו עד חרן וישבו שם:
32
ויהיו ימי תרח חמש שנים ומאתים שנה וימת תרח בחרן:
